جيت في بالي .. معقول فاكرنا ؟
معقول نكون .. بعد اللي كان
لينا مكان على بالك ...؟
لو كنت فاكر .. أو بتسأل :
لو مصمم عالحكايه أنا هحكيهالك :
**************
الرصاصه اللي في أعلى الصدر مياله لشمالك
إللي خطفت باقي عمرك و في ثواني من قبالك
اللي كَـسَرِت خاطر أمك .. و إشتهـِت يـُـتم لعيالك
الرصاصه اللي طلقها الكلب كانت مكتوبالك !!
الرصاصه دي رزق جالك .. ريـَّـحت مـِ الهم بالك
ربنــا العــالـِـم بحــالنا .. و كلنــا عالمين بحالك
سـِـيبت دنيــا الهم لينا .. و صَبَحِت الجنه مآلك
************************
و إن كان علينا ؟ و الله يا ابني انت اللي فينا !!
قصدي يعني ألف بعد الشر عنك
إوعى ترجع تاني فينا !!!
بالمفيد المختصر ؟
إنت فينا المنتصر
إحنا فينا إللي إنكسر !!
و اللي اتعصر !!
و إللي إتحسر !!
و إللي مات لما إنقهر !!
أقول كمان ؟ و لا إكتفيت بالمختصر ؟
خليني ساكته .. أصل الحاجات دي بتتنظر !!
و بلاش أعكر صفو بالك .. مش هحكيهالك
******************************
إبقى إفتكرنا .. بس و إدعي لنا
يا ينعدل حالنا
يا يرزقنا اللي رزقك
رصاصه خاينه
أعلى الصدر مياله لشمالنا
نسيب الأرض للجبروت
ياكل في بعضه يموت
و تبقى الجنه مكتوبالنا
******************
بقلمي : زهرة الجبل
28 يناير 2013
ليست هناك تعليقات:
إرسال تعليق