ودي

يا دنيا على مهلك عليا ..

حــِلمك شويه ..

روقي و وِدي

إحتار دليلي..

لو تسمحيلي ..

خدي معايا في الرأي و إدي

ويـايا ليه بتسبـَّـقي

على طول عـِدا ؟

مع إن أنـا الوِد ودي

أمد يد الحب ليكي ..

و أبدُر عليكي ..

و عــالخــلق ودي

يلا حالاً حالاً بالاً .. حييوا أبو الفساد

قالوا زمان و كلامهم حكمه ... عـُـمر الشقي ممطوط و مديد

تــــمــانين سنه و شوية فــكه ... و صابغ و مداري التجاعيد

نصبر و نقول فاضل تكه ... تعيد في العمر سنين و تزيد

كنت فارسنا .. مش مغوار .. قصدي متقل في المعيار

فارس شعب بحاله و قاهره ... و مقسمنا سياد و عبيد

كل سنه إحتفالات و منافقه ... و عيد ريسنا ده أسعد عيد

ندعي في سرنا .. يقصف عـُـمرك ... و صوتنا يقول لك عـُمر مديد


بس الدنــيـــــا ما هيـــش دايمـــالــك

ثــــار الشــعــب و غيــَّــر حالك

و حـِـلـِـف و حياة مصر و نيلها

ليربيـــك و يــربــي عيـــالــك



و في يوم عيدك بعد الثوره ... من طيبة أخلاقنا أكيد

جينا نهني و جبنا معانا ... بدل التورته صنف جديد

عيش و حلااااوه و بجامه بيضا ... و أساور معدنها حديد

و سلاسل مـِ الصنف العالي ... تلبسهم مـِ الإيد للإيـد

و مرايـــا علشان تتفرج ... على نــفـــسك بعد التــجديـــد

و المرادي بقى هندعيلك .. من قلبنا ... منغيــر تهديد

مـِـد شويه يا رب في عـُـمـره .. و إطرح فيه البركه و زيــد

و إجعل منه عــبره .. و آيه .. للي يشوف الكرسي رصيد