فضفض يا قلبي متستحيش إنك حزين
متسيبش وجعك يخنقك منغير أنين
دافن فـ رمل الصبر جرحك من سنين
عنيك بتضحك و دموعها فيها مخنوقين
الجرح جاي فوق جرح و عنيك فرحانين
طب خدت إيه لما بقيت مـ الكدابين؟؟
لا الجرح طاب و لا قلب الوجع بيلين
فضفض يا قلبي متستحيش كونك حزين
إنزع بقى قناع الرضا ... و إطلق آهاتك في الفضا
سيب صرختك تخرج تصم السامعين
فضفض بقى !!!
بتداري ليه عنهم دموعك .. و تغص تبلع جرحهم ؟
و الدمعه لو مره تخونك .. تجري و تبعد عنهم !!
مخدوع يا قلبي لو كنت فاكر إنك بجد تهمهم
ليه يجرحوك ما بين عينيك و تقول لي غصبـ(ن) عنهم
ماشيين خطاهم تدوس عليك و إنت بتنكر ظلمهم
صدقني دول بيغمضوا ... و كأنهم مش موجودين
لو سمعوا آهتك يضحكوا ... بيداروا على صوت الأنين
دول سهروك تشرب كاسات علقم و هُم.. !! ..مرتاحين
و حيروك .. مره جبابره .. و مره ملايكه معصومين !!
خلاص يا قلبي إبكي بقىى و ماتداريش إنك حزين
لحد فين تدفن فـ رمل الصبر جرحك طول سنين
و خدنا إيه ؟؟
لا الجرح طاب و لا قلب الوجع بيلين
لا الدمع عيب ... و لا صبر طبب جرح و لا غير نصيب
فضفض بقى