هو ينفع ؟
يعني ممكن ؟
سألت نفسي في يوم .. :
هيجرى إيه يعني ؟
لو أعكس الموازين !!
لو أفك أسر الروح ..
و أنسى شويه أنا مين ؟
جربت أخرف و أرفرف ..
!! عصفور و له جناحين
و أطلق جناحي في الهوا
و مسألش رايح فين
عجبتني هلوستي ..
والفكره خطفتني ..
لعالم المجانين
و لقيتني جوا الريش ..
إسترها يامثبت
العقل ويا الدين
يا كسوفي إيه الريش ده ؟
يا إخواننا جالي منين ؟
و لقيتني فجأه بطير ..
و بتوه مع العصافير ..
و الدنيا تحت العين
رعبتني هلوستي
يا خوفي لما اعلا
أقع على رقبتي
و يشوفني حد بريشي
هودي وشي فين ؟
و شويه و لقيتلكم
نفسي بتتعود
كأني من يومي
حمامه بالجناحين
مبقتش أخاف مـِـ الريش
و قلت لازم أعيش
اللحظه دي بسنين
و فضلت أهز جناحي
و أحركه أقوى
و ألف ويا الهوا
شمال كده و يمين
مع كل متر لفوق
برمي الهموم و بروق
لكن بخاف أكتر
من وقعتي لو أفوق
عقلي يقول لي إرجعي
أقول كمان مترين
و تحيا هلوستي
و سمعت فجأه صوت
خايف كده و حزين
كأنه متحسر
منغير بكا لكن
نبراته شايله الهم
و حـِـسه متفسر
مليان قلق .. مسكين
ملفوف كلامه بخوف
و اللي قلقني أكتر ..
إني لمحت مابين
كلامه شئ مألوف
كأنه قال كلمه سمعتها مره
فجأه إفتكرت التون
ده إسمي قبل الريش
إبعد .. خلاص ماتجيش
إسكت ماتسحبنيش
من فوق و تتهور
سيبني في هلوستي
غمضت عيني و قلت
يا ساتر استرها
و كل خوفي كان ..
جناحاتي تتكسر !!
ساعتها بس ندمت
و كرهت هلوستي
وقعت !!
أيوه وقعت
حسيت بنفسي رجعت
فتحت عيني بخوف
مرعوبه كـُـلِّـي كسوف
كان نفسي أبقى مفيش
لكن ضروري أشوف
هيقولوا إيه عالريش
و أتقصى بالمره
و أشوفني واقعه فين ؟
بصيت بطرف العين
لقيت وشوش خايفه
ده كله مـِ الريشتين ؟
و الله ناس هايفه !!
و قلت أداري الريش
بـشوفه مالقيتهوش
أمال جرالهم إيه ؟
بيبحلقوا كده ليه ؟
و بيرغوا كدهوه فـ ايه
ركزت حبه سمعت
صوتهم كموج عاتي
لسه مافسرتوش
فركت عيني و شفت
دول أمي و أخواتي
و شعري كان منكوش
قالوا وقع قلمك
قلنا أكيد نمتي
و فجأه خطرفتي
و بقيتي تتخانقي
و تشيلي و تحطي
و أمي بكت مالخوف
و استصعبت بختي
يا خساره كل ده حِلم ؟
لكن و إيه يعني ؟
مادام جرت مره
و رجعت منها بخير
في إيه هيمنعني؟
هيجرى إيه يعني ؟
لو حتى كل يومين
أعكس كده الموازين
و أنسى شويه أنا مين
و أركِب الريشتين
و أطير مع الطايرين
وحتى يعني بفرض
لما تناديني الأرض
هرجع بطيب خاطر
ما دمت كل يومين
بفكرتي هسافر
و تحيا هلوستي
************
********
***
**
*
بريشة / زهــــــرة الجــبــــــــل
ليست هناك تعليقات:
إرسال تعليق