ده يرضي مين حرق القلوب على الضنا ..... ده يرضي مين... ؟
ده يرضي مين يا نـــــار و آيده في قلبنا ..... ده يرضي مين... ؟
و فــاضل إيــه بعد الضنا ؟ ده عرضنا ..... ده يرضي مين... ؟
طب ريحوني بنتي عايشه؟ولا فرحمة ربنا.. يا مـؤمـنـيــــن... ؟
أنا عايـــــزه بنتي .. تاخدوها ليه بذنبي أنا ؟ ...الـبـت فيــــن... ؟
الذنب ذنبي ... الجــُــرم جــُرمي ....أنا و أبوها الغلطانين
.
.
أنا إللي ربيتها كده !!!
.
.
أنا إللي قلت لها إن صــــوت الـحــق مـــــش لازم يـــخـــــــاف
أنا إللي قلت لها بإيــدنــا هــتـنتـهي سنــينـــنا العـُــجـــــــاف
أنا إللي قلت لها البــشــر لمــا تلَمـلِمـهـم عصى يبقوا خـِراف
أنا إللي قلت لها ده عارنا إن البلد جاعت ومش لاقيه الكفاف
أنا إللي قلت لها الكرامه ... عمرهــــا ما توجت روس الضعاف
.
.
طيب هاتوها
إرحموها ورجعوها
إتقرصنا خلاص فهمنا
درسنا طال حته منا
.
.
و إن عـُدتوا مره ... تشوفوا ضل البت بره ...
عن بيت أبوها ...
إبقوا خدوها
بس إرحموني و إرحموها
.
.
.
كيبورد بنتي خاف و إنكسر .. وقعت خــلاص مِـنــه الحــروف
و آدي قلمها إللي كتب فِهـِمْ العتب .. أصـبــح يتيـم مقصوف
وصوت بناتنا إن كان عـِلا .. راح نكتمه.. راح ينخرس بالخوف
.
.
.
إن عـُدتوا مره تسمعوا صوتها يقول للفقر لأ
إبقوا إقتلوها
.
إن عُــدتوا مره تــحِـسوا إنهــا هتقول يا حق
إبقوا إحرقوها
.
بس إرحموني دي سابقه أولى و إرحموها
و ريـــحوا عينيا بشوفتــهـــا و رجعوهــــا
.
.
.
و إعذروني !!!!
.
.
مكنتش أعرف إن الشمس بعيد كده .. خــــلاص عـــرفت بإنهــــا فـِــعلاً بعيد
و إنه وراهــــا برااح و ِ ســـايع كــل ده .. وبراحها لسه بيانه أن (هل من مزيد)
و إنه إللي راح وراهـــا ما يفيده الندا .. أصـله إللي راح وراهــا مـِتلجم حديد
.
.
.
آآآآآآآه يا بشر..ممكن سـؤال مـن فضلكم؟
ومـاتخـافوش .. سؤالـــي مـش هَيهـِزُكُم
هــكتــم صراخــي مــش هيــجـرح ودنكم
همسح دمــوعي مـــش هـتـنزل عندكم
بس إسمحولي أنا برضه أم ....زي أمكم
و إللي فـ قلبي لو حسيتـــوه كان هدكم
أنا حـــاسه ليــــه إني غريـبه فـ وسطكم؟
لا كـأني مـِنكـم .. و لا إن بنتــي تخصكم؟
يعني عشـــان بنــاتكو نــايمه فـ حضنكم؟
إســــــراء تهــــون ؟ وهي تايهه فـ همكم؟
طب تعرفوا؟
ساعات بحس إن إنتو صح فـ صمتكم
بلاش جنان .. خلوا بناتكو فـ حضنكم
.
.
.
أنا بنتي رااااحت ... شكلها فـ حته بــعيـــده
ونـــاري مش راح تنطفي بكارثـــه جــديــــده
خلوا بناتكوا فـ حضنكوا ... آمنـــه .. سعيــده
وسيبولي حسرة قلبي على بنتي الوحيده
آه ياناري...حسرة قلبي على بنتي الوحيده
ليست هناك تعليقات:
إرسال تعليق